काठमाडौँ । प्रतिनिधि सभाको बिहीबारको बैठक सुरू भएको छ ।
निर्धारित समयभन्दा केही ढिला गरी बैठक सुरू भएको हो । बिहान ११ बजेका लागि बैठक बोलाइए पनि करिब ३५ मिनेट ढिला बैठक सुरू भएको थियो ।
संसद सचिवालयका कर्मचारीहरूले अतिरिक्त समयको सेवा सुविधा माग गर्दै गत जेठ २१ गतेदेखि ११ बुँदे माग राखेर आन्दोलन गरेका कारण संसदका बैठक पनि प्रभावित हुने गरेका छन् ।
बैठकको सुरूमा शून्य समयमा सांसदहरूले विभिन्न विषयमा धारणा राखिरहेका छन् । बिहीबारको बैठकमा प्रधानमन्त्री पुष्पकमल दाहाल ‘प्रचण्ड’ सँग सांसदहरूले प्रश्न सोध्ने र प्रधानमन्त्रीले जबाफ दिने कार्यक्रम पनि छ ।
उनले आफ्नो भारत भ्रमणको बारेमा संसदलाई जानकारी दिएका छन् । भारतीय प्रधानमन्त्री नरेन्द्र मोदीको तेस्रो कार्यकालको शपथ ग्रहणमा गएका प्रधानमन्त्री प्रचण्डले आफ्नो भ्रमण बारे विहिबार संसदलाई जानकारी गराएका हुन् ।
उनले विविध कारणले यस अघि संसदलाई जानकारी गराउन नसकेको बताउदै भारत भ्रमणको क्रममा भारतीय राष्ट्रपति द्रौपदी मुर्मु, प्रधानमन्त्री मोदी, क्याबिनेट मन्त्री एस जयशंकर, भारतीय उद्योग वाणिज्य महांसघका प्रतिनिधिहरुसँग भेटवार्ता गरेको जानकारी गराएका हुन् ।
त्यस्तै प्रधानमन्त्री प्रचण्डले राष्ट्रपति रामचन्द्र पौडेलको स्वीजरल्याण्ड र जर्मनीको भ्रमण बारे पनि संसदलाई जानकारी गराएका छन् ।
