काठमाडौँ । कालिकोटको खाँडाचक्र नगरपालिकाका निमित्त प्रमुख प्रशासकीय अधिकृत प्रवलजंग शाही र लेखापाल धिर बहादुर शाहीले आफ्नो जिम्मेवारीबाट राजीनामा दिएका छन् ।
उनीहरूले बुधवार जिम्मेवारीबाट राजीनामा दिएका हुन् । जनप्रतिनिधिको दबाब र काम गर्न सक्ने वातावरण नभएको भन्दै उनीहरूले राजीनामा दिएका हुन् । लेखापाल शाहीले भने, ‘बजेट एउटै छ । एउटै बजेटलाई कता कति तान्ने रु करारका कर्मचारीले पुसदेखि तलब पाएका छैनन् । अर्को तोक लागेका योजनाको पनि भुक्तानी दिनुपर्ने । दुवै काम एउटै बजेटबाट गर्न सक्ने अवस्था रहेन र जिम्मेवारीबाट राजीनामा दिएको हुँ ।’
लेखापाल शाहीले यसबारे नगरप्रमुख कमल बहादुर शाहीलाई पनि पटक पटक जानकारी गराएका थिए । कार्यपालिकाको बैठकमा पनि यो विषय जानकारी गराएको लेखापाल शाहीले बताए । तर, समस्याको समाधान नभएपछि राजीनामा दिएको उनको भनाइ छ । गत जेठ २ गते नै राजीनामा दिने तयारीमा रहेका लेखापालले बुधवार निमित्त प्रमुख प्रशासकीय अधिकृत प्रवलजंगसँगै राजीनामा दिएका हुन् ।
गैरकानूनी रूपमा भुक्तानी दिन बाध्य बनाउने, योजनामा काम गरेर खर्च गरिसक्ने समयमा योजना बाँडफाँड गर्ने, बजेट र रकम बिनै आफ्ना कार्यक्रमलाई सिफारिस गर्न बाध्य पार्ने जस्ता कार्यहरू गर्न नसकिने भएपछि उनीहरूले राजीनामा दिएको बताइएको छ । आर्थिक वर्षको अन्त्यमा प्रमुख प्रशासकीय अधिकृत र लेखापाल जिम्मेवारीबाट बाहिरिएपछि उपभोक्तादेखि सेवाग्राहीसम्म प्रभावित भएका छन् ।
नगरप्रमुख कमल बहादुर शाहीले कर्मचारीहरूको राजीनामा बारे बुझ्न बाँकी रहेको प्रतिक्रिया दिए । उनले भने, ‘यो बुझ्न बाँकी छ । अहिले कार्यपालिकाको बैठक चलिरहेको छ । यो बारे बुझ्न बोलाएको छु । म बुझ्छु ।’
