काठमाडौँ । नेकपा एमालेका सांसद योगेश भट्टराईले काठमाडौँ महानगरपालिकाका मेयर बालेन शाहको चर्को आलोचना गरेका छन् । एमाले सचिव समेत रहेका सांसद भट्टराईले मंगलबारको
प्रतिनिधिसभा बैठकमा बोल्दै मेयर शाहलाई आफू काठमाडौँ महानगरपालिकाको प्रमुख हुँ भन्ने नभुल्न चेतावनी दिएका हुन् ।
मेयर शाहले पूर्वप्रधानमन्त्री समेत रहेका नेकपा एमालेका अध्यक्षको नाम लिएर सामाजिक संजालमा ‘गिरिबन्धु टी–स्टेट प्रकरण’मा नीतिगत भ्रष्टाचार भएको आरोप लगाएपछि संसद बैठकमा बोल्दै सांसद भट्टराईले काठमाडौँका प्रमुखले संमयता गुमाउँदै गएको आरोप लगाए ।
२०५४ सालमा एमालेले काठमाडौँ महानगरको चुनाव जितेपछि सभ्य सहर बनाउने अभियान थालेको भन्दै पछिल्लो पटक विद्यासुन्दर शाक्यजी आएपछि रानीपोखरी, कमलपोखरी, दरबार स्क्वायर पुनर्निर्माणको काम गरेको बताए ।
‘काठमाडौं महानगरका प्रमुखलाई हामी सहयोग गर्न तयार छौँ । काठमाडौं फोहोर व्यवस्थापन र चोक चोकमा सांस्कृतिक सहर एमालेले बनाएको हो । अहिले पनि बालेनजीलाई म भन्न चाहन्छु पैसा कति चाहियो सरकारले दिन तयार छ । सरकारले दिन्छ । प्रधानमन्त्री अर्थमन्त्री र सम्बन्धित मन्त्रीलाई भनौँला । काठमाडौँलाई अझै सुन्दर बनाउने योजना के छन्, आउनुस्,’ सांसद भट्टराईले भने, ‘उत्तेजना फैलाएर हुँदैन । तपाईंमार्फत् लाखौँ युवाहरूले भविष्य खोजेका हुन् । तर पछिल्लो दिनमा जसरी जाँदै हुनुहुन्छ त्यसले ती युवाहरूलाई धोखा हुन्छ ।’
