धनगढीका मेयर हमालले राष्ट्रियसभा निर्वाचनमा मतदान नगर्ने

काठमाडौँ । धनगढी उपमहानगरपालिकाका नगर प्रमुख गोपाल हमालले राष्ट्रियसभा सदस्यको मतदान नगर्ने भएका छन् । जारी राष्ट्रियसभा सदस्यको मतदानमा मेयर हमाल सहभागी नहुने भएका हुन् ।

राष्ट्रियसभा सदस्यका लागि सुदूरपश्चिम प्रदेश सभा सचिवालयको परिसरमा मतदान जारी रहेको छ । अहिलेसम्म स्थानीय तहका १७३ जनाले मतदान गरेका छन् ।

दुई जनाले मतदान गर्न बाँकी रहेको निर्वाचन अधिकृतको कार्यालयले बताएको छ । प्रदेश सभाका भने ५२ जनाले नै मतदान गरेका छन् । प्रदेश सभामा ५३ जना सदस्य रहेकोमा एक जनाको मृत्यु भएको थियो ।

स्थानीय तहमा १७५ जनामा १७३ जनाले मतदान गरेका छन् । सुदूरपश्चिमबाट राष्ट्रिय सभाको तीन सदस्यका लागि ६ जना चुनावी मैदानमा रहेका छन् ।