काठमाडौँ । राष्ट्रियसभा सदस्यको रिक्त १९ पदका लागि आगामी माघ ११ गते हुने निर्वाचनका लागि उम्मेदवारहरुले मनोनयन पत्र दर्ता गरेका छन् ।
देशका सातवटै प्रदेश मुकाममा स्थापना गरिएका निर्वाचन अधिकृतको कार्यालयमा सोमबार बिहान १० बजेदेखि दिउँसो ३ बजेसम्म उम्मेदवार मनोनयन दर्ताको समय तोकिएको थियो ।
सात वटै प्रदेशमा सत्तारुढ गठबन्धन, प्रमुख प्रतिपक्षी एमाले, राप्रपालगायत दलका उम्मेदवारहरुले उम्मेदवारी दर्ता गराएका छन् । सत्तारुढ गठबन्धनमा रहेका दलहरु मध्ये कांग्रेसबाट १० जना, माओवादीबाट ६ जना, नेकपा एकीकृत समाजवादीबाट दुई जना, जनता समाजवादी पार्टीबाट एक जनाले उम्मेदवारी दर्ता गराएका छन् ।
यस्तै, प्रतिपक्षी एमालेले १९, राप्रपाले ९, नेपाल मजदुर किसान पार्टीले ४ तथा जनमत पार्टीले १ सिटमा उम्मेदवारी दिएको छ । अहिलेसम्म प्राप्त बिवरण अनुसार कुल ५२ जनाले उम्मेदवारी दिएका छन् । जसमा कोशी र मधेश प्रदेशमा ५÷५, बागमतीमा १५, गण्डकीमा ८, लुम्बिनीमा ७, कर्णाली र सुदुरपश्चिममा ६÷६ जनाको उम्मेदवारी परेको छ ।
सोमबार दर्ता भएको उम्मेदवारीउपर मंगलबार दाबीविरोध र उजुरी, २५ र २६ गते जाँचबुझ गरी उम्मेदवारीको नामावली प्रकाशन हुने छ भने २७ गते नाम फिर्ता लिन चाहने उम्मेदवारको नाम फिर्ता र उम्मेदवारको अन्तिम नामावली प्रकाशन हुने छ । उम्मेदवारलाई पुस २८ गते निर्वाचन चिह्न प्रदान गरिने छ । मतदान माघ ११ गते बिहान ९ देखि दिउँसो ३ बजेसम्म हुने छ ।
यस निर्वाचनमा प्रदेशसभा सदस्य र गाउँपालिका अध्यक्ष र उपाध्यक्ष तथा नगरपालिका प्रमुख र उपप्रमुख मतदाता छन् । कानुनी व्यवस्थाअनुरुप प्रदेशसभा सदस्य पाँच सय ४९ र पालिका प्रमुख र उपप्रमुख गरी जम्मा २०४७ जनाको मतदाता नामावलीमा स्वीकृत भएको छ । राष्ट्रिय सभा निर्वाचनका लागि सात प्रदेशमा एक–एक मतदानस्थल र दुई–दुई मतदान केन्द्र कायम गरिएको छ ।
निर्वाचनमा प्रदेश सभा सदस्यको मतभार ५३ तथा पालिका प्रमुख र उपप्रमुखको मतभार १९ कायम गरिएको छ । उक्त निर्वाचनमा प्रदेशसभा सदस्यको कूल मतभार २९ हजार ९७ र पालिका प्रमुख र उपप्रमुखको कूल मतभार २८ हजार चार सय ६२ रहने छ । आयोगका अनुसार मतदाताको अन्तिम नामावली आइतबार प्रकाशन भइसकेको छ ।
स्थायी सदनका रुपमा रहेको ५९ सदस्यीय राष्ट्रिय सभाका एक तिहाइ सदस्यको कार्यकाल प्रत्येक दुई वर्ष सकिन्छ ।
