काठमाडौँ । प्रधानमन्त्री पुष्पकमल दाहाल ‘प्रचण्ड’ले नेपाल संवतलाई राष्ट्रिय संवतको रुपमा मनाउन संकीर्णता गर्नु नहुने बताएका छन् ।
आज काठमाडौँको वसन्तपुरमा आयोजित नेपाल संवत् ११४४ को कार्यक्रमलाई सम्बोधन गर्ने क्रममा उनले उक्त धारणा व्यक्त गरेका हुन् ।
उनले नेपाल संवतलाई राष्ट्रिय संवतको रुपमा मान्यता दिलाउनको निम्ति नेवार समुदायले गरेको काम साह्रानिय रहेको बताए । उनले नेपाल संवत् राष्ट्रिय संवत् भएकाले सबै मिलेर मनानुपर्ने बताए ।
प्रधानमन्त्री प्रचण्डले नेपाल संवतलाई राष्ट्रिय संवत् भनेर मात्रै नपुग्ने भन्दै सबै सरकारी दस्ताबेजहरुमा उल्लेख गर्न अनिवार्य गरिएको जानकारी दिए ।
‘’नेपाल संवतलाई राष्ट्रिय संवतको रुपमा मान्यता दिलाउनको निम्ति नेवार समुदायले गरेको कामलाई उच्च सम्मान गर्दछु ।” प्रधानमन्त्री प्रचण्डले भने, ‘ त्यसकारण यसलाई मनाउने कुरामा कुनै खालको संकीर्णता हामी कसैले देखाउनु हुँदैन ।’
‘नेपाल संवतलाई राष्ट्रिय संवत् भनेर मात्रै पुग्दैन, कार्यान्वयन गर्नुपर्छ भनेर निर्णय गरेको छु ।’, उनले भने ।
