एजेन्सी । एकदिवसीय विश्वकप २०२३ को ३२औं खेलमा साविक उपविजेता न्युजिल्यान्डले आज दक्षिण अफ्रिकाको सामना गर्दैछ । खेल दिउँसो २ः१५ बजेदेखि महाराष्ट्र क्रिकेट एसोसिएसन स्टेडियम (एमसीए), पुणेमा हुनेछ । खेलअघि दिउँसो १ः४५ बजे टस हुनेछ ।
आजको खेल जित्ने टोलीलाई सेमिफाइनल पुग्ने बाटो सहज हुनेछ । ६ खेलमा ४ जित हात पारेको न्युजिल्यान्ड ८ अंकसहित तालिकाको तेस्रो स्थानमा छ । दक्षिण अफ्रिका ६ मध्ये ५ खेल जितेर १० अंकसहित दोस्रो स्थानमा छ ।
सन् १९९९ देखि विश्वकपमा यी दुईबीच ५ खेल भएका छन् जसमा न्युजिल्यान्डले सबै पाँच खेल जितेको छ । जसमा २०११ र २०१५ विश्वकपका २ नकआउट खेलहरू पनि समावेश छन् ।
हेड टु हेडः
दक्षिण अफ्रिकाविरुद्धको एकदिवसीय क्रिकेटमा न्यूजिल्याण्डको प्रदर्शन खासै राम्रो छैन । दुई टोलीबीच हालसम्म कुल ७१ ओडीआई खेलिएको छ । न्यूजिल्याण्डले २५ खेल जितेको छ भने दक्षिण अफ्रिकाले ४१ खेल जितेको छ । ५ खेलको नतिजा आएको छैन ।
तर, विश्वकपमा न्युजिल्यान्ड दक्षिण अफ्रिकामाथि हावी छ । दुवै टोली अहिलेसम्म ८ पटक भिडेका छन्, जसमा न्युजिल्यान्डले ६ र दक्षिण अफ्रिकाले २ खेल मात्र जितेको छ ।
दुवै टोली चार वर्षपछि एकदिवसीय क्रिकेटमा भिड्दैछन् । पछिल्लो पटक दुवै टोली २०१९ को विश्वकपमा आमनेसामने भएका थिए । प्रतियोगिताको २५ औं खेल बर्मिङ्घममा भएको थियो, जसमा न्युजिल्यान्डले अन्तिम ओभरमा चार विकेटले विजयी भएको थियो । टोलीका नियमित कप्तान केन विलियम्सनले खेलमा शतक प्रहार गर्दै टोलीलाई जित दिलाएका थिए ।
कस्तो छ मैदान ?
प्रतियोगिताको तेस्रो खेल एमसीए रंगशालामा हुँदैछ । यस मैदानमा यसअघि भारत–बंगलादेश र अफगानिस्तान–श्रीलंकाका खेल पनि खेलिएका थिए । यहाँको पिच ब्याटिङमैत्री छ ।
यस मैदानमा हालसम्म ९ एकदिवसीय खेल खेलिएको छ जसमा पहिले ब्याटिङ गर्ने टोलीले ४ र पछि ब्याटिङ गर्ने टोलीले ५ खेल जितेको छ । पहिलो इनिङ्सको औसत २९४ रन रहेको छ ।
सर्वाधिक टिम स्कोर ३५६ हो, जुन भारतले २०१७ मा इङ्ल्यान्ड विरुद्ध बनाएको थियो । सबैभन्दा कम टोलीको स्कोर २३२ हो, जुन भारतले सन् २०१३ मा अस्ट्रेलियाविरुद्ध बनाएको थियो ।
पुणेमा आज पानी पर्ने सम्भावना छैन । यस अवधिमा हावाको गति ९ किलोमिटर प्रतिघण्टा रहनेछ । तापमान १८ देखि ३३ डिग्री सेल्सियस सम्म हुन सक्छ ।
दुबै टिमका सम्भावित सुरुवाती–११
न्यूजील्यान्डः टम लाथम (कप्तान/ विकेटकीपर), डेभोन कोनवे, विल यंग, रचिन रविन्द्र, डेरिल मिचेल, ग्लेन फिलिप्स, जेम्स निशम, मिचेल सान्टनर, म्याट हेनरी, लोकी फर्गुसन र ट्रेन्ट बोल्ट ।
दक्षिण अफ्रिकाः टेम्बा बभुमा (कप्तान), क्विन्टन डी कक, रस्सी भान डेर डुसेन, एडेन मार्कराम, हेनरिक क्लासेन, डेभिड मिलर, मार्को जान्सन, केशव महाराज, लुंगी एनगिडी, तबरेज शम्सी र जेराल्ड कुटेजी/कागिसो रबाडा ।
