एजेन्सी । भारतको आन्ध्र प्रदेशको भिजियानगरममा आइतबार साँझ भएको रेल दुर्घटनामा ९ जना यात्रुको मृत्यु भएको छ र २९ यात्रुहरू घाइते भएका छन्, जसमध्ये केहीको अवस्था गम्भीर छ र अस्पतालहरूमा उपचार भइरहेको छ।
हावडा चेन्नई लाइनमा विशाखापट्टनम रायगडा प्यासेन्जर स्पेशल ट्रेनले विशाखापट्टनम पलासा प्यासेन्जर एक्सप्रेसलाई पछाडिबाट ठक्कर दिँदा दुर्घटना भएको हो।
कान्तकपल्ले र अलामान्डा रेलवे स्टेशनहरू बीचको ठक्करका कारण दुबै रेलहरू नराम्ररी क्षतिग्रस्त भएका छन्।
कम्तीमा पाँचवटा डिब्बा पटरीबाट खसेका छन् । यसका कारण पनि उद्धारकार्यमा समस्या भएको बताइएको छ ।
प्रारम्भिक रिपोर्टहरूका अनुसार रायगडा जाँदै गरेको रेल सिग्नल नाघेको र मानवीय त्रुटिका कारण दुर्घटना भएको हो ।
अङ्ग्रेजी दैनिक इन्डियन एक्सप्रेसले रेल मन्त्रालयका वरिष्ठ अधिकारीहरूलाई उद्धृत गर्दै भनेको छ, पछाडिबाट ठोक्किएको ट्रेनको चालकले कथित रूपमा सिग्नल मिस गरेको र रातो संकेत पार गरेका थिए। जसका कारण सुस्त गतिमा गुडिरहेको लोकल ट्रेनसँग ठोक्कियो ।
