काठमाडौँ । आज नेपाली कांग्रेसको केन्द्रीय कार्य समितिको बैठक बस्दैछ । आज दिउँसो १ बजे बैठक बस्न लागेको हो ।
कांग्रेस केन्द्रीय कार्यालयका मुख्य सचिव कृष्णप्रसाद पौडेलले केन्द्रीय कार्य समितिको बैठकमा मङ्सिर ११, १२ र १३ गते बस्ने महासमिति बैठकको तयारीबारे छलफल हुने जानकारी दिए ।
उनले भने, ‘‘महाधिवेशनमा नेतृत्व चयन गर्यौं । नीति अधिवेशनका लागि केन्द्रीय कार्य समितिको यसअघिको बैठकले नीति महाधिवेशनले निर्दिष्ट गरेको सबै काम महासमितिले गर्ने निर्णय गरेको थियो ।” नीति महाधिवेशनको लागि महासमितिको बैठक बस्नुपर्ने उनको भनाइ छ ।
उनले महासमिति बैठकमा पारित गरिने नीति र कार्यक्रमको तयारी सम्बन्धमा छलफल हुने बताए ।
यसैगरी, कांग्रेसको गत साउन २ देखि १० गतेसम्म बसेको केन्द्रीय कार्य समितिले तय गरेको विभिन्न कार्यक्रमको कार्यान्वयन, उपलब्धि सम्बन्धमा समिक्षा हुने उनले जानकारी दिए ।
