एजेन्सी । आज राति च्याम्पियन्स लिगको सेमिफाइनलको पहिलो लेगमा रियल मड्रिड र म्यानचेस्टर सिटीबीच प्रतिस्पर्धा हुँदैछ । गएको सिजन म्यानचेस्टर सिटीलाई रियल मड्रिडले पाखा लगाएको थियो ।
गएको सिजन गरेको गल्ती यस सिजन नदोहोराउने रणनीतिमा म्यानचेस्टर सिटी रहेको छ । रियलको घरेलु मैदानमा हुने खेलमा म्यानचेस्टर सिटी सकारात्मक नतिजा निकाल्ने दाउमा रहेको छ ।
यस सिजन उच्च फर्ममा रहेको म्यानचेस्टर सिटीले तीन वटा उपाधि जित्ने अपेक्षा गरिरहेको छ ।
तर, रियल मड्रिडको च्याम्पियन्स लिगको इतिहास निकै बलियो रहेको छ । गएको सिजन लिभरपुललाई पराजित गर्दै उपाधि जितेको रियल यस सिजन पनि उपाधि जित्ने दाउमा रहेको छ ।
फाइनलको यात्रा तय गर्न रियलले यसपटक उच्च फर्ममा रहेका स्टार खेलाडी इर्लिङ हाल्याण्डलाई रोक्न कठिन हुनेछ ।
प्रशिक्षक पेप ग्वार्डिवालाले यस सिजन म्यानसिटी हालसम्मकै बलियो टिमका रुपमा रहेको बताएका छन् । रियलका प्रशिक्षक कार्लो एन्सेलोटीले आफ्नो टिम म्यानसिटीलाई रोक्न र आफ्नो पक्षमा नतिजा निकाल्न सक्षम रहेको बताएका छन् ।
