एकीकृत समाजवादीका दुई केन्द्रीय सदस्यद्वारा पार्टी परित्याग

काठमाडौँ। नेकपा एकीकृत समाजवादी पार्टीमा असन्तुष्टि बढेको छ। पार्टीमा जिम्मेवारी र केन्द्रीयसदस्य मनोनयन गर्ने निर्णयसँगै पार्टीमा असन्तुष्टि बढेको हो।

भदौ ५ देखि ७ गतेसम्म बसेको छैटौं केन्द्रीय समिति र भदौ १७ र १८ गते बसेको ६५ र ६६ औं सचिवालयको बैठकको निर्णय कार्यान्वयनका लागि एकीकृत समाजवादीले बिहीबार अन्तरपार्टी निर्देशन जारी गरेको थियो। त्यसमा केन्द्रीय सदस्य मनोनयन र कार्यविभाजनसमेत उल्लेख छ।

त्यसमै असन्तुष्टि जनाउँदै दुई केन्द्रीय सदस्यले पार्टी परित्यागको घोषणा गरेका हुन्। केन्द्रीय सदस्यद्वय राजु गुरूङ र सावित्री मल्लले पार्टी परित्याग गरेका हुन्।

गुरुङ पार्टीका लुम्बिनी प्रदेश सचिव पनि हुन्। गत निर्वाचनमा रूपन्देही–२ बाट प्रतिनिधि सभा सदस्यको उम्मेदवार बनेका गुरुङको उम्मेदवारी कर्जा सूचना केन्द्रको कालोसूचीमा रहेकाले सर्वोच्च अदालतले खारेज गरिदिएको थियो। गुरुङले पार्टी परित्याग गरेर स्वतन्त्र रहन चाहेको बताएका छन्।