काठमाडौँ। नेपाली महिला क्रिकेट टिम मलेसियासँग पराजित भएको छ। मलेसियाविरुद्ध भइरहेको ट्वान्टी–२० अन्तर्राष्ट्रिय क्रिकेट शृंखलाको पाँच खेलमध्ये पहिलो खेलमा नेपाली टिम पराजित भएको हो।
क्वालालम्पुरस्थित वाईएसडी–यूकेएम ओवलमा भएको खेलमा महिला क्रिकेट टोली सोमबार ५ विकेटले पराजित भएको हो।
मलेसियाले टस जितेपछि ब्याटिङमा आएको नेपाल १६.५ ओभरमा ५० रनमै अलआउट भयो। ज्योति पाण्डेले ११ र सम्झना खड्काले १३ रन बनाउनुबाहेक अन्यले दोहोरो स्कोर बनाउन सकेनन्। डेब्यु गरिरहेकी सम्झनाले २५ बल खेल्दै १ चौका प्रहार गरिन्। ज्योतिले १७ बल खेल्दै २ चौका प्रहार गरिन्।
मलेसियाको लागि निक एटिइलाले ३ विकेट लिइन्। प्लेयर अफ द म्याच उनले ४ ओभरमा १ मेडन राख्दै १८ रन खर्चिइन्। एइना हसिम, एइसा फिर्दाउज र माहिराह इस्माइलीले २–२ विकेट लिइन्। एइनाले ३.५ ओभरमा १०, एइसाले २ ओभरमा ९ र माहिराहले ४ ओभरमा ३ रनमात्र खर्चेकी थिइन्।
मलेसियाले १३.२ ओभरमा लक्ष्य पूरा गर्यो। वान जुलिया रोस्दीले १३ र एइनाले अविजित १२ रन बनाइन्। नेपालबाट रुविना र सीताले २–२ तथा कविता कुँवरले १ विकेट लिइन्।
नेपाल र मलेसियाबीचको शृंखलाको दोस्रो खेल मंगलबार हुनेछ।
