पीएफए वर्ष खेलाडीको अवार्ड एर्लिङ हालाण्डलाई

काठमाडौं । म्यानचेस्टर सिटीका फरवार्ड एर्लिङ हालाण्डले पीएफए वर्ष खेलाडीको अवार्ड जितेका छन् ।

प्रोफेसनल फुटबलर्स एसोसियसन (पीएफए)ले प्रदान गर्ने उक्त अवार्डबाट हालाण्ड पुरुषतर्फको विजेता घोषित भएका हुन् ।

युवा वर्ष खेलाडीको अवार्ड भने आर्सनलका बुकायो साकाले प्राप्त गरे । नर्वेका फरवार्ड हालाण्डले गत सिजन सिटिले ट्रेबल उपाधि जित्दा उत्कृष्ट प्रदर्शन गरेका थिए । उनले सिटीका लागि सबै प्रतियोगिता गरी ५२ गोल गरेका थिए ।

हालाण्डले सिटीकै केभिन डी ब्रुएना र जोन स्टोन्ससहित आर्सनलका साका र मार्टिन ओडेगार्ड तथा बायर्न म्युनिखमा आबद्ध भएका टोटेनहमका तत्कालीन खेलाडी ह्यारी केनलाई पछि पारे ।

हालान्ड सन् २०२२ मा ५१ मिलियन पाउण्डमा बोरुसिया डर्टमण्डबाट म्यानचेस्टर सिटीमा अनुबन्धित भएका थिए ।