महेन्द्रनगर । प्रादेशिक अस्पताल जनकपुरधाममा मुटु रोगको उपचार सुरु भएको छ । यसअघि गङ्गालाल हृदय रोग केन्द्रमा मात्र उपचार हुने गरेको मुटु रोगको उपचार आजदेखि प्रादेशिक अस्पताल जनकपुरधाममा सुरु भएको निर्देशक डा रामनरेश पण्डितले बताए ।
लामो समयदेखि जनशक्तिको अभावले मुटुको परीक्षण गर्ने इन्डोस्कोपी मेसिन थन्किएकोमा शिक्षण अस्पताल महाराजगञ्जबाट चिकित्सक डा निश्चल साह आएपछि मुटुको उपचारसम्बन्धी सेवा सुरु भएको डा पण्डित बताए । ओपिडी सेवा आइतबारदेखि शुक्रबारसम्म हुने भएको पनि प्रादेशिक अस्पतालले जनाएको छ । डा पण्डितले भने, “इन्डोस्कोपी मेसिन जनशक्तिको अभावले करिब एक वर्षदेखि थन्किएर बसेको थियो ।”
अहिले जनशक्ति आएसँगै सेवा सुरु भएपछि उपचार गराउन आएका ५० वर्षीय दुखी यादवले खुसी प्रकट गरे । मुटुको सम्पूर्ण अवस्थाका विषयमा इसीजी तथा इन्डोस्कोपी गरेर जानकारी लिन सकिने डा निश्चल साहले बताए ।
मधेस प्रदेशको गौरवको योजनाअन्तर्गत रहेको मधेस स्वास्थ्य विज्ञान प्रतिष्ठानअन्तर्गत सञ्चालनमा रहेको प्रादेशिक अस्पताल जनकपुरधामको सेवाप्रति प्रश्न उठ्ने गरे पनि नयाँ नयाँ रोगको उपचारका लागि आएका मेसिन सञ्चालनमा ल्याइएपछि स्थानीयबासी खुसी भएका छन् ।
त्यस्तै नसासम्बन्धी समस्या पत्ता लगाउनका लागि खरिद गरिएको इएमजी मेसिन पनि सञ्चालनमा आएको छ । यसले नसा च्यापिएको भए पनि सजिलै पत्ता लागेर समाधानका लागि उपचार गर्न सकिने प्राविधिक कर्मचारी वीरेन्द्रकुमार यादवले बताए ।
यसका साथै अस्पतालमा मानसिक रोगको प्रभावकारी उपचारका लागि परीक्षणका लागि खरिद गरेर ल्याइएको इइजी मेसिन पनि सञ्चालनमा आएको छ । यसका साथै फोक्सोको अवस्थाका विषयमा परीक्षणका लागि आएको पिएफटी मेसिन पनि सञ्चालनमा आएको छ ।
