भक्तपुरको बाल सुधारगृहको ढोका फोडेर १५० बढी बालबालिका फरार

काठमाडौँ। भक्तपुरको बाल सुधारगृहको ढोका फोडेर १५० बढी बालबालिका फरार भएका छन्। सानोठिमीस्थित युसेफको बालसुधार गृहको ढोका फोडेर सोमबार दिउँसै अपराधमा मुछिएका कम्तीमा १५० जना बालबालिका तथा किशोरहरू फरार भएका हुन्।

भक्तपुरका प्रमुख जिल्ला अधिकारी खगेन्द्र प्रसाद रिजालले फरार भएको बताउँदै उनीहरूको खोजीका लागि सुरक्षाकर्मीहरू परिचालन गरिएको जानकारी दिए। आइतबार त्यो बालसुधार गृहमा एक बालकको मृत्यु भएपछि आफन्तले गेटमा प्रदर्शन गरेका थिए। प्रदर्शनका क्रममा उनीहरूले तोडफोड पनि गरेका थिए।

त्यसबेला भित्र रहेका अधिकांश बन्दीहरूले पनि प्रदर्शनकारीलाई नै साथ दिदैँ प्रदर्शनमा सामेल भएका थिए। सुधार गृहमा २५६ जना बन्दी रहेकोमा अहिले ३२ किशोरी र केही बालकहरू मात्रै बाँकी रहेको प्रजिअ रिजालले जानकारी दिए।

फरार रहेकामध्ये केहीलाई भने पक्राउ गरिएको र अन्यको खोजी कार्य जारी गरेको प्रजिअ रिजालले जानकारी दिए। फरारहरूको खोजीका लागि ठूलो संख्यामा सुरक्षाकर्मी परिचालन गरिएको छ।