एमालेबाट विदा भए केशव स्थापित

काठमाडौँ। नेकपा एमाले नेता केशव स्थापित पार्टीको केन्द्रीय कमिटीबाट हटेका छन्। एमालेले स्थापितसँगै सिरहाका प्रमोद यादवलाई केन्द्रीय सदस्यबाट हटाएको हो।

उनीहरू आफैँले पार्टीको केन्द्रीय सदस्यको जिम्मेवारीबाट हटाउन नेतृत्वलाई आग्रह गरेकाले एमाले केन्द्रीय कमिटीबाट बिदा गरिएको बताइएको छ।

सोमबार बसेको एमालेको सचिवालय बैठकले उनीहरूको राजीनामा स्वीकृत गरेको हो। बैठकले केदार न्यौपाने र छक्कबहादुर लामालाई भने पार्टीको केन्द्रीय सदस्य बनाएको छ।

गत स्थानीय तहको निर्वाचनमा काठमाडौँ महानगरपालिकाको मेयर पदमा हारेपछि स्थापित लगभग निस्क्रिय भएका थिए। स्थापितले के गर्ने भनेर सार्वजनिक गरेका त छैनन तर निकटस्थहरुलाई आफूले नयाँ केही गर्न लागेको बताउने गरेका छन्।