एजेन्सी । शाहरुख खानको आगामी फिल्म ‘जवान’का केही क्लिप लिक भएका छन् । शाहरुखको प्रोडक्सन कम्पनी ‘रेड चिलीज इन्टरटेनमेन्ट’ले यस सम्बन्धमा एफआईआर दर्ता गरेको छ ।
अगस्ट १० मा, यो एफआईआर सूचना प्रविधि ऐन अन्तर्गत दर्ता गरिएको थियो ।
निर्माण कम्पनीले क्लिप लीक गर्नु प्रतिलिपि अधिकार उल्लङ्घन भएको बताएको छ । क्लिप लीक भएपछि फिल्मको गोप्यता समाप्त हुन्छ । फिल्ममा धेरै कुरा लुकेका हुन्छन् । यस्तो अवस्थामा रिलिजअघि नै क्लिप बाहिरिएपछि फिल्मको मार्केटिङ प्रभावित हुन्छ ।
जवानको क्लिप लीक भएको यो पहिलो पटक होइन । अप्रिलमा पनि फिल्मसँग सम्बन्धित दुईवटा भिडियो लिक भएको थियो । पहिलो क्लिपमा शाहरुखको झगडाको दृश्य थियो । दोस्रो क्लिप डान्स सिक्वेन्सको थियो, जसमा शाहरुख र नयनतारालाई देखाइएको थियो ।
दिल्ली उच्च अदालतले यस सम्बन्धमा आदेश दिएको थियो । अदालतले सामाजिक सञ्जाल प्लेटफर्म, वेबसाइट, केबल टिभी आउटलेट र अन्य माध्यमहरूलाई फिल्मको क्लिप हटाउन निर्देशन दिएको थियो ।
शाहरुखको प्रतिक्षित यो फिल्म सेप्टेम्बर ७ मा रिलिज हुँदैछ । फिल्ममा शाहरुखका अलावा नयनतारा, विजय सेतुपति शीर्ष भूमिकामा छन् । फिल्मलाई साउथका चर्चित निर्देशक एट्लीले निर्देशन गरेका छन् ।
