एमालेको अवरोधको काराण प्रतिनिधिसभा बैठक २६ गतेसम्मका लागि स्थगित

काठमाडौँ। नेकपा एमालेले प्रतिनिधिसभाको बुधवारको बैठक पनि अवरुद्ध गरेको छ।

सुन तस्करी प्रकरणमा उच्चस्तरीय छानबिन समिति गठनको माग गर्दै एमालेले नाराबाजीसहित वेल घेराउ गर्दै बैठक अवरुद्ध गरेको हो। सभामुख देवराज घिमिरेले पटक–पटक बैठक अघि बढाउनका लागि सहयोग गर्न आग्रह गरेपनि एमालेले सांसदहरुले नमानेपछि बैठक साउन २६ गतेसम्मका लागि स्थगित गरे।

बैठक शुरु हुने वित्तिकै एमालेले समय मागेपछि सभामुखले एमाले सांसद सूर्य थापालाई बोल्न समय दिएका थिए। तर सत्तापक्षका सांसदहरुले पनि बोल्न समय मागे। सांसद थापालाई समय सकियो भनेपछि एमाले सांसदहरुले वेलमा आएर नाराबाजी गरे। बुधबारको बैठकमा एमालेका सांसद सूर्य थापाले तस्करीको संरक्षण गर्ने गरी गृहमन्त्रीको जवाफ आएको बताए।