आजदेखि पाेखरा महानगरले लामेआहालमै फोहर लैजाने, अवरोध भए बल प्रयोग हुने

कास्की । आजदेखि पोखरा महानगरपालिकाको फोहोर उठ्ने भएको छ । संकलन गरिएको फोहोर पोखरा ३२ लामेआहालमै लगेर व्यवस्थापन गरिने भएको छ ।

जिल्ला सुरक्षा समितिका अध्यक्षसमेत रहेका प्रमुख जिल्ला अधिकारी (सिडिओ)वासुदेव घिमिरेको अध्यक्षतामा सोमबार बसेको बैठकले मंगलबारदेखि फोहोर व्यवस्थापन लामेआहालमा लगेर व्यवस्थापन गर्ने निर्णय गरेको जानकारी पोखरा महानगरपालिकाका प्रवक्तासमेत रहेका वडा नम्बर २५ का अध्यक्ष मोतीलाल तिमिल्सिनाले दिए ।

फोहोर व्यवस्थपानमा अवरोध भए बल प्रयोग गर्ने तयारी समेत भएको बताइएको छ । तर, महानगरपालिका प्रवक्ता तिमिल्सिनाका अनुसार त्यो अवस्था नआउने जनाए ।

महानगरपालिकासँग भएको १६ बुँदे सम्झौता पालना हुने उनले बताए ।