विश्वम्भर श्रेष्ठले सम्हाले कायमुकायम प्रधानन्यायाधीशको जिम्मेवारी

काठमाडौँ। प्रस्तावित प्रधानन्यायाधीश विश्वम्भरप्रसाद श्रेष्ठले आजदेखि कायममुकायम प्रधानन्यायाधीशका रुपमा न्यायपालिकाको नेतृत्व लिएका छन्।

प्रधानन्यायाधीश हरिकृष्ण कार्की ६५ वर्षे उमेर हदका कारण साउन २० गतेदेखि अनिवार्य अवकाशमा गएपछि श्रेष्ठले कामु प्रधानन्यायाधीशको जिम्मेवारी लिएका हुन्। सर्वोच्च अदालतले आफ्नो वेभसाइटमा कायम मुकायम प्रधान न्यायाधीशमा श्रेष्ठको नाम राखिएको छ।

साउन १८ गते बसेको संवैधानिक परिषद्को बैठकले श्रेष्ठलाई प्रधानन्यायाधीशमा सिफारिस गरिसकेको छ। १४ जना न्यायाधीशमध्येबाट परिषद्ले वरिष्ठतम् न्यायाधीश श्रेष्ठको नाम प्रधानन्यायाधीशका लागि सिफारिस गरेकोले उनी सर्वोच्च अदालतको ३१औं प्रधानन्यायाधीश बन्नेछन्। निवर्तमान प्रधान न्यायाधीश कार्कीलाई सर्वोच्च अदालतले बिदाइ आज गर्दैछ।