भ्रष्टाचारविरुद्ध रास्वपाले घण्टी बजाउँदै आएको छः रवि लामिछाने

काठमाडौँ। राष्ट्रिय स्वतन्त्र पार्टी (रास्वपा)का सभापति रवि लामिछानेले भ्रष्टाचारविरुद्ध रास्वपाले घण्टी बजाउँदै आएको बताएका छन्। सोमबार सुदूरपश्चिम–काठमाडौँ सम्पर्क भेलालाई सम्बोधन गर्दै लामिछानेले यस्तो बताएका हुन्।

रास्वपाको भ्रष्टाचार विरोधी अभियानका कारण सरकारलाई भ्रष्टाचारका पुराना फाइल खोल्न प्रेरणा मिलेको दाबी लामिछानेको छ। उनले नयाँ पुस्तालाई प्रतिनिधित्व गर्ने व्यक्ति पार्टीमा जोडिने क्रम जारी रहेको बताए।

उनले रास्वपाको उपस्थितिले पनि सदनदेखि सरकारसँग र विभिन्न राजनीतिक दलहरुमा चलायमान अवस्था देखिएको भन्दै यो राम्रो संकेत भएको बताए। लामिछानले आगामी चुनावसम्म धेरै काम गर्न बाँकी रहेकाले अहिलेदेखि नै ८४ को मिसनमा ध्यान केन्द्रीत गर्न आग्रह गरे।

उनले सुदूपश्चिमलाई सधैं दुर्गम बनाउन नहुने बताए। उनले बिरामी पर्दा काठमाडौँका जनताले जस्तै स्वास्थ्य सेवा पाउँछन् सुदूरपश्चिमका जनता सेवा पाउने बनाउनुपर्ने धारणा राखे। उनले सुदूरपश्चिमलाई सुन्दरपश्चिम बनाउन सबै लाग्नुपर्नेमा जोड दिए।