एजेन्सी । विश्वकप २०२३ मा भारत र पाकिस्तानको भिडन्त कहिले ? यो करोडौं क्रिकेट फ्यानहरूको लागि ठूलो प्रश्न बनेको छ। आईसीसीले जुन २७ मा विश्वकपको तालिका सार्वजनिक गरेको थियो, जसअनुसार भारत र पाकिस्तानबीचको खेल अक्टोबर १५ मा अहमदाबादको नरेन्द्र मोदी स्टेडियममा हुने भनिएको थियो । तर, अब खेलतालिका घोषणा भएको एक महिनापछि भारत–पाकिस्तान खेलको मिति नै परिवर्तनको चर्चा सुरु भएको छ ।
यो खेल अब १५ अक्टोबरको सट्टा १४ अक्टोबरमा हुन सक्ने बताइएको छ ।
यस विषयमा बिहीबार दिल्लीमा बीसीसीआईको ठूलो बैठक बस्दैछ ।
बीसीसीआईको यो बैठकमा के हुन्छ भन्ने ठूलो प्रश्न हो । उक्त बैठकमा भारत–पाकिस्तान खेलका बारेमा पनि छलफल हुने र त्यसपछि ठूलो निर्णय हुने बताइएको छ ।
अक्टोबर १४ मा न्युजिल्यान्ड र बंगलादेश, इंग्ल्याण्ड र अफगानिस्तानबीच पनि भिडन्त हुनेछ । यस्तो अवस्थामा भारत–पाकिस्तान खेल पनि अक्टोबर १४ मा हुने हो भने प्रशारण च्यानलमा पनि समस्या आउन सक्छ ।
यस खेलको समयतालिका परिवर्तन गर्दा पनि धेरै कुरा परिवर्तन गर्नुपर्ने हुन्छ । अर्थात् खेलाडीको होटल बुकिङदेखि उडान टिकटसम्म सबै परिवर्तन हुनेछ ।
यसबाट प्रसारकहरू मात्र नभई खेलाडीहरूलाई पनि समस्या हुनेछ । हजारौं फ्यानहरूले विश्वकपको तालिका घोषणासँगै भारत–पाकिस्तान खेलको टिकट बुक गरिसकेका छन् ।
यससँगै अहमदाबादका प्रत्येक होटल पनि बुक गरिएको छ।
अब म्याचको मिति परिवर्तन भयो भने धेरै फ्यानहरुले नोक्सानी भोग्नुपर्नेछ ।
