काठमाडौँ। अष्ट्रेलियाली राजदुत फेलिसीटी भोल्क र विविसी माष्टरशेफः द प्रोफेसनलस् रि–म्याच २०२१ का बिजेता शेफ सन्तोष साहले तालिमका सहभागीहरुलाई प्रमाणपत्र वितरण गरेका छन्। उनीहरुले दिदी फाउण्डेसन नेपालद्वारा सञ्चालित ब्यवसायिक पाकशिक्षा तालीमका सहभागीहरुलाई तालिम सम्पन्नताको प्रमाणपत्र प्रदान गरेका हुन्।
अष्ट्रेलियाली दुतावासले दिदी फाउण्डेसनलाई पाकशिक्षा तालिम केन्द्र स्थापना गर्न र बिपन्न समुदायका १५ महिलाहरुको पहिलो समुहलाई प्राविधिक शिक्षा तथा व्यावसायिक तालिम परिषद्को पाठ्यक्रममा आधारित ३९० घण्टाको छोटो अवधिको व्यावसायिक पाकशिक्षा तालीम प्रदान गर्न सहयोग गरेको थियो।
कक्षा दशको अनिवार्य अंग्रेजी विषयको पाठ्यक्रममा जीवनकथा समावेश भएका संसार भर प्रख्यात शेफ साहले तालीममा सहभागीहरुलाई सम्बोधन गर्दै आफ्नो जीवन यात्राको बारेमा बताए।
सबै ब्यक्तिको आफ्नो बिशिष्टता हुने र आफैंले आफ्नो लागि उपयुक्त जीवन पथ पहिल्याउनु पर्ने बताए। आफ्नो सबल पक्षहरुको पहिचान गरेर जीवनका उद्देश्यमा ध्यान केन्द्रित राखेर आफ्नो जीवन मूल्य र स्व–अनुशासनका साथ काम गर्न सल्लाह दिए। “प्रत्येक ब्यक्ति फरक हुन्छ र उसले आफुलाई बुझ्नु पर्छ र आफुलाई खुसी पार्न आवश्यक सीपहरुमा पोख्त हुनुपर्छ,” उनले भने।
राजदुत भोल्कले तालीमका सहभागीहरुलाई बधाई दिए र दिदि फाउण्डेसनलाई सफलता पूर्वक तालीम गराएर रोजगारी, जीविकोपार्जन र व्यावसायिक यात्रामा महिलाहरुलाई सहयोग गरेकोमा धन्यावाद ज्ञापन गरे।
