सुनचाँदीको भाउ आज पनि घट्यो

काठमाडौँ। आज नेपाली बजारमा सुनचाँदीको भाउ घटेको छ। गत बिहीवार अहिलेसम्मकै उच्च तोलाको १ लाख १३ हजार ६ सय रुपैयाँ पुगेको सुनको भाउ त्यसपछि लगातार घटेको हो।

आज तोलामा ३ सय रुपैयाँले घटेर १ लाख १२ हजार रुपैयाँमा कारोबार भइरहेको नेपाल सुनचाँदी व्यवसायी महासङ्घले जनाएको छ। हिजो पनि सुनको भाउ तोलामा पाँच सय रुपैयाँले घटेको थियो। हिजो तोलाको १ लाख १२ हजार ३ सय रुपैयाँ थियो। त्यस्तै, शुक्रवार तोलाको एक लाख १२ हजार ८ सय रुपैयाँमा कारोबार भएको थियो।

आज चाँदीको भाउ पनि घटेको छ। तोलामा ५ रुपैयाँले घटेर चाँदी आज १ हजार ४ सय ६० रुपैयाँमा कारोबार भैरहेको छ। चाँदीको भाउ हिजो तोलामा १ हजार ४ सय ६५ रुपैयाँ थियो।