सुन प्रकरणमा मेरो संलग्नता छैनः दीपक मल्होत्रा

काठमाडौँ। व्यवसायी दीपक मल्होत्राले करिब एक क्वीन्टल सुन बरामद प्रकरणमा आफ्नो संलग्नता नभएको स्पष्टिकरण दिएका छन्। बिहीबार दिँउसो पत्रकार सम्मेलन गर्दै मल्होत्राले विमानस्थलमा पक्राउ परेको सुनमा आफ्नो संलग्नता नभएको प्रष्ट पारेका हुन्।

सुन प्रकरणबारे आफ्नो नाम मुछेर समाचार प्रकाशित भएपछि स्पष्टिकरण दिँदै उनले समाचार भ्रामक र कपोलकल्पित भएको बताएका हुन्।

मल्होत्राले भने,‘सुन आयातमा म र मेरो परिवार संलग्न छैन। मेरो साझेदार कम्पनी पनि संलग्न नरहेको स्पष्ट पार्न चाहन्छु।’

‘अनुमानको भरमा स्रोतको हवाला दिँदै पत्रकारले समाचारमा मेरो नाम मुछेका छन्। तस्बिरसमेत राखेर मेरो सार्वजनिक जीवनमा प्रहार गर्न खोजेका छन्,’ मल्होत्राले भने।