काठमाडौँ। नेपालले युनाइटेड अरब इमिरेट्स (यूएई)लाई ३ विकेटले हराएको छ। एसीसी मेन्स इमर्जिङ कप अन्तर्गतको खेलमा नेपालले यूएईलाई पराजित गरेको हो।
कुशल भुर्तेलको अलराउन्डर प्रदर्शनप्रेरित खेलमा नेपाल विजयी भएको हो।
यूएईले प्रस्तुत गरेको १५८ रनको लक्ष्य नेपालले २३ ओभरमा ७ विकेट गुमाएर पूरा गरेको हो।
नेपालको जितमा भुर्तेलले ब्याटिङतर्फ ७१ रन बनाए। आक्रामक रूपमा प्रस्तुत भएका भुर्तेलले ४३ बलमा ९ चौका र ४ छक्का प्रहार गरे। त्यसअघि यूएईले १५७ रनमा सबै विकेट गुमाउँदा घातक बलिङ गरेका भुर्तेलले ६ विकेट लिएका थिए।
ब्याटिङमा नेपाका देव खनाल र सन्दीप जोराले समान २४ रन जोडे। त्यस्तै, गुल्सन झाले ११ रन, कप्तान रोहितकुमार पौडेलले ९ रन, प्रतिश जीसीले ८ र कुशल मल्लले दुई रन जोडे।
यूएईका मोहम्मद फराजुद्दिनले पाँच विकेट लिए। ६ ओभर बलिङ गरेको फराजुद्दिनले एक मेडन राख्दै ३६ रन खर्चिए। मुहम्मद जवादुल्लाहले दुई विकेट लिए।
