काठमाडौँ एफसी खुमलटार शहिद स्मारक ‘ए’ डिभिजन लिगबाट रेलिगेशनमा परेको छ। शुक्रबार सातदोबाटोस्थित एन्फा कम्प्लेक्समा भएको खेलमा जारी सिजनको उपाधि विजेता टिम चर्च ब्वाइज युनाइटेडसँग पराजित भएपछि खुमलटार रेलिगेसनमा परेको हो।
नवप्रवेशी क्लब खुमलटारले लिगको अन्तिम खेलमा चर्च बोइजसँग २–० गोलको हार व्यहोरेको हो। एन्फा कम्प्लेक्समा सम्पन्न खेलमा १० खेलाडीमा सिमित चर्च ब्वाइजले जित निकालेको हो। चर्च ब्वाइजका लागि सुशील शाहले १२ औं मिनेटमा तथा जोस्पे बेम्पाले इन्ज्युरी समयमा गोल गरे।
यता चर्च ब्वाइजका गोलरक्षक एभ्स प्रिसोले दोस्रो हाफमा रातो कार्ड खाँदा चर्च ब्वाइज १० खेलाडीमा सिमित भएको थियो।
सो खेल तनावग्रस्त बनेको थियो। पहिलो हाफमा खुमलटारका बेन्चमा रहेका खेलाडी र अफिसियलले रेफ्रीमाथि आक्रमण गर्दा खेल तनावग्रस्त भएको हो। रेफ्रीले खुमलटारको बेन्चमा रहेका ३ अफिसियल र १ खेलाडीलाई रातो कार्ड दिएका थिए। रेफ्रीले सुरक्षा माग गर्दै खेल स्थगित गरेका थिए। आधा घण्टापछि खेल सुरु भएको थियो।
चर्च ब्वाइजले २६ खेलमा ४८ अंक जोडेको छ।
खुमलटारको भने जम्मा २७ अंक रहेको छ।
यता फ्रेन्ड्स क्लबले अन्तिम खेलमा नेपाल एपिएफ फुटबल क्लबलाई ४–० ले पराजित गरेपछि रेलिगेशन टरेको छ।
अब थ्री स्टार र एपिएफमध्ये एक टोली अर्को सिजन बी डिभिजनमा घटुवा हुने समीकरण बनेको छ। रेलिगेशनबाट बच्नको लागि थ्री स्टारलाई जित चाहिएको छ।
