काठमाडौं, साउन १३/प्रधानमन्त्रीको निर्वाचनमा कसलाई समर्थन गर्ने भन्ने विषयमा साउन ५ गते व्यवस्थापिका संसद्को बैठक सुरु हुनुभन्दा एक घण्टाअघिसम्म माओवादी सभासद्हरूलाई थाहा थिएन । मतदान हुनुभन्दा केही घण्टाअघि माओवादी र एमालेबीच भएको सहमतिका बारेमा सभासद्हरूलाई अन्तिममा मात्र थाहा दिइयो । माओवादी स्थायी समिति बैठकले दुइतिहाइ मत पुग्ने अवस्था भएमा एमालेलाई समर्थन गर्ने निर्णय गरेको थियो तर यसबारे स्वयं सभासद्हरू बेखबर थिए ।

काठमाडौ, साउन १३/प्रधानमन्त्री चुन्नका लागि दुईपटक भएका निर्वाचनहरु निरर्थक भएपछि आगामी १७ गते तेस्रोपटक निर्वाचन हुँदैछ । तर, राजनीतिक दलहरुबीच सरकार गठनका सन्दर्भमा विद्यमान अडान यथावत हुँदा प्रधानमन्त्री निर्वाचित हुने सम्भावना बलियो भने देखिदैन । पर्याप्त बहुमत हुँदहुँदै पनि उमेदवारी फिर्ता लिएको एमालले राष्ट्रिय सहमति कायम नभए तेस्रो पटकको चुनावमा पनि तटस्थ बस्ने निर्णय गरेको छ भने मधेसवादी दलहरु 'पर्ख र हेर' को मनस्थितिमा छ ।